Page 16 - Magazin Rom 6

MITOLOGIA

O Devel ked čerđa e Rome

Jekh šužo dive, o Devel anđa odluka te čerel manuše. Ljelja čik hem
počmija te čerel. Ked ulo gotovo, čhivđa olje ki jekh but bari tepsija te
pečol.

“Đi pečola, ka lav maje jekh dremka” - mislinđa o Devel peklje gođaja.

Palo disavo vakti, uštinlo o Devel kotar sojbe hem setisalo te ikalji
i tepsija kotar šporeti. So te dikhel o Devel, o manuš zifti kalo ulo.
Tegani o Devel phenđa:

“Tu ka ove e kaljengoro dad!”

O Devel na hine baš čalo sar ulo o manuš hem manglja te probini
paljem. Ljelja čik hem počmija te čerel. Ked ulo gotovo, čhivđa olje ki
jekh but bari tepsija te pečol.

“Akana na cidava man kotar akava than” - vačerđa o Devel.

Ama, sar čhivđa, ađahare hem ikalđa i tepsija. So te dikhel o Devel, o
manuš sar thud parno ulo. Ko odova momenti o Devel phenđa:

“Tu ka ove e parnengoro dad!”

O Devel ni akava drom na hine čalo sar ulo o manuš, pa manglja pana
jekh paluno drom te probini. Ljelja čik hem počmija te čerel. Ked ulo
gotovo čhivđa olje ki jekh but bari tepsija te pečol. Ama, akava drom
i tepsija ikalđa baš ko vakti keda čače valjanđa te ikalji. So te dikhel o
Devel, o manuš dobinđa zlatno boja. Odova hine e Devlesoro najšužo
delo đi akana. Tegani o Devel phenđa:

“Tu ka ove e Romengoro dad!”

Romani Mitologia,
but purani Romani paramiz

sead.serifi@magazinrom.com

16